شوبير عبر راديو أون سبورت : من هم حكام مواجهات القمة الثلاثة ؟ ولماذا مصرى واخر أجنبى ؟
كتب : اسماعيل حلمى
بالنسبة للمباريات، طلعت كده قصة من لجنة حكام، قالك إن أمين عمر مش هيقود مباريات حساسة وده كان توجيه من الاتحاد الدولي
وانا طلعت هنا قلتلك: اوعى تصدق الكلام الفارغ ده، كلام فارغ ولا أساس له من الصحة، مفيش حاجة اسمها كده
• حكام كبار هايلعبوا كأس عالم و يديروا مباريات هامة في الدوريات الأوروبية، فمتصدقش الله يخليك الكلام الفارغ اللي بتسمعه من الناس ده إنه استجابة لتوجيهات
الحاجة الثانية، أنا قلتلك إن محمد الغازي حكم كتير جداً للزمالك وحكم مباريات وراء بعض كتيرة ومحمود وفا في قول إنه معاقب بعد مباراة بروكسي ومسار، وفي قول إنه في بطولة شمال أفريقيا، يعني أقوال كثيرة جداً، لكنه مختفي عن الساحة
طيب، واقتصرت القصة في النهاية على إنه مباراة الزمالك و سيراميكا مش يحكمها غير واحد من الثلاثة: يا إما أمين عمر، يا إما محمود بسيوني، يا إما محمود ناجي
وهما حكام مش مفضلين لدى جماهير الزمالك وده منطقي
وعلى فكرة من حق الجمهور إنه ميبقاش مرتاح لحكم معين، ده حق طبيعي
أنا حتى وأنا لعيب كان في حكم معين لما يجي يحكم ليا كنت ببقى متضايق جداً
لكن ما أقدرش أقول إنه ما يجيش يحكم ليا، ولا الجمهور يقدر يقول كده، لكن ممكن يقول أنا مش برتاح له . كل ده وارد في عالم كرة القدم فهنا جاء الإصرار أو التمسك بالحكم الأجنبي اللي هيدير اللقاء
وكان واضح إنه لجنة الحكام هتكمل مع المدرسة الألمانية بعد النجاح في مباراة الأهلي وبيراميدز، والنجاح في مباراة الأهلي والزمالك
فجاءت مباراة الزمالك وسيراميكا لنرى حكماً ألمانياً جديداً، ‘ساشا ستيجمان‘، وكل بقى الطاقم اللي معاه سواء الحكام المساعدين أو الحكم الرابع أو الفار كلهم من ألمانيا
لكن أمين عمر هيدير الأهلي والمصري، وده رد على كل التصريحات الفشنك اللي طلعت من بعض الناس في إدارة التحكيم أو اللي سربوها أنه مش هيدير ماتشات كبيرة قبل كأس العالم
لأن إحنا بندير إزاي؟ بندير بقصة إنه تسرب وتشوف رد الفعل
دي بالونة اختبار، موجودة من زمان في الوسط الكروي
بترمي الخبر وتشوف الناس هتتقبل محمود وفا ولا ايه
فاترمت قصة أمين عمر، وفي الآخر حاطينه فعلاً في مباراة الأهلي والمصري
هي مباراة مصرية في الدوري وبتحدد بطل الدوري
وترتيب الأهمية كان: الزمالك وسيراميكا، بعدها بيراميدز وسموحة، ثم الأهلي والمصري
لأن محمود ناجي هيدير بيراميدز وسموحة
فلو مكنش كده كان ممكن أمين عمر يدير الزمالك وسيراميكا، ومحمود ناجي يدير الأهلي والمصري
هى دي كل القصة زي ما حصلت بالضبط الخاصة بحكام مواجهات القمة الثلاثة .
